Anders syns framför grön skog och blått vatten
Anders Alapää Foto: Egen

Anders ja kieli

Kohtaa yhtä sekretariaatin työntekiöistä.

Hei Anders,

Sie aloit töihiin komisuunile jo helmikuussa ja nyt sie olet saanu pitenetyn tehtävän syyskuuhuun asti. Kerroppa, mitäs sie tehet töiksi?

Mie kuuntelen nauhotettuja haastatteluja, joitako tutkimussekreteerarit oon tehneet, ja kirjotan referaattia niistä. Suunile puolet haastattelumateriaalista oon meänkielelä, mutta mie kirjotan referaatit ruottiksi. Mie olen komisuunin työn lisäksi puoliaikaa töissä meänkielisen tikitaalin sanakirjan kansa.

Se oon korvaamaton saatavuus komisuunile ette sie hallittet niin ruottia ko meänkieltä. Oleks ollu kakskielisesti töissä ennen?

Mie olen rapean kymmenen vuen aikana ollu erilä laila töissä meänkielen kansa. Ensinä mie olin töissä Pajalan kunnassa käsittelinnää kysymyksistä jokka koskit hallintoaluetta meänkielele ja suomenkielele, mutta mie käänsin ja tulkkasin kansa niile kielile ja niistä. Sitten mie olen jatkanu työtä meänkielen kansa. Mie olen pitäny kielikursia täysile ja olin kansa vuen töissä meänkielen opettajanna peruskoulussa Korpilompolossa oppilhaitten kansa esikoululuokasta yheksäntheen luokhaan. Ennen sitä mie olin töissä kirkole suunile kymmenen vuotta eri seurakunnissa Norrbottenissa ja Västerbottenissa.

Viimiset neljä vuotta mie olen tehny töitä ja ottanu esile tikitaalisen meänkielisen suursanakirjan. Instityytti kielile ja kansanmuistoile (ISOF) rahotti projektiä ja sanakirja oon saatavanna ylheisölle ISOF:in kotisivula.

Kunkas tärkeä meänkieli oon sulle?

Mie olen kasunu ylös Korpilompolossa Tornionlaaksossa, johonka mie olen siirtyny takashiin. Usseimat jokka oon kasuhneet ylös Tornionlaaksossa 80- ja 90-luvuila, niinku mie olen, ei puhu itte meänkieltä, mutta moni saattaa kuitenki käsittää kieltä.

Toisin ko monet muut minun iässä mie aloin puhhuun meänkieltä minun vanhuuksitten kansa ko mie olen 10-vuen ikäsennä. Se oon ollu kauhean arvokasta mulle ette pittää matkassa kieltä ja osata puhua sitä, ei aivan työelämässä. Mie olen saanu pareman kontaktin monen ihmisen kansa ja sitä saapii ulos enämpi elämästä Tornionlaaksossa – täälä tullee hauskemaksi ellää. Paljon Tornionlaakson elämästä tapahtuu meänkielelä, ja ilman kieltä sitä menettää paljon.

Semesterit alkavat hetin ja Tornionlaakso oon monele tutkimaton alue. Onkos sulla yhthään hyvvää semesteritipsiä?

Mie ehotan matkan pitkin Kaihnuunväylää johonki niistä mahtavista koskista. Luonto oon osittain kauhean tramattinen. Jokkfallissa oon ruokaa ja vyösiiaa, mutta jos sitä halvaa nauttia luonosta enämpi rauhassa sitä saattaa käyä Mestoslinkassa. Koski oon helpposaatava tien vieressä Täränön ja Ylikaihnuun välissä, mutta luonto tuntuu kauhean villiltä. Käyntiä Mestoslinkala sitä ei unhouta!