Porträttbild av Hanna Aili
Foto: Egen

Arvokas vaihto

Tärkeä keskustelu Met Nuoret organisasuunin kansa

Tottuus- ja sovintokomisuunila oon 31 maaliskuuta ollu iltakokkous Met Nuoret organisasuunin kansa, ja sitä eusti puhheenjohtaja Hanna Aili. Keskustelu nuoriso-organisasuunin kansa tapahtuu jatkuvasti ja komisuunile se oon arvokasta ette ottaa ossaa nuoreman sukupolven ajatuksista ja mielipitheisistä.

Kokkouksen aikana puhheenjohtaja Elisabet Fura selvitti komisuunin nykysestä tilantheesta. Hään kerto ette komisuuni oon saanu kaheksanen jäsenen paikan pääle ja ette vielä yks puoliaikaresyrsi oon otettu töihiin ette tuottaa kertomuksitten ja toistuksitten kokoamisheen. Vaikka oon pantemii niin komisuuni suunittellee ette haastattelutyö alkaa huhtikuun aikana. Net saattavat olla haastatteluina telefoonin kautta jos varmoja fyysisiä kokkouksia ei saateta karanteerata.

Kokkouksen aikana keskustelthiin kansa SVT-sarjasta ”Vi var en lägre ras” joka oon lähätetty. Nuoriso-organisasuunissa net oon kattonheet ja puhuhneet sarjasta ja tykkäävät ette se oon intresantti ja arvokas. Hanna Aili meinasi kansa ette se oli hyvä ette nuorempi sukupolvi oon saanu tulla puhheeksi sarjassa.

Hanna Aili kerto ette kulttuurileiriä tulhaan järjestämhään kesälä yhessä nuoriso-organisasuunitten Kvääninuoret (Norja) ja Karjalaizet Nuoret (Suomi) kansa. Leiri tullee olheen käynissä Tornionlaaksolaisitten päivänä 15 heinäkuuta ja ajatukset ja iteat tulit esile ette komisuuni ja Met Nuoret piiain saattasit tehjä jonku aktiviteetin yhessä juhlimisen aikana Täränössä. Ensi keskustelukokkous Met Nuoret organisasuunin kansa suunitelthaan jälkhiin ko organisasuuni oon pitäny vuosikokkouksen huhtikuun lopussa.