Josephine Ylipää
Josephine Ylipää. Foto: Eva Dahlén

Josephine vahvistaa sekretariaattia

Josephine Ylipää tullee tuottamhaan haastattelutyössä.

Hei Josephine,

Sie olet yks jäsenistä komisuunissa, mutta tulet nyt vahvistamhaan työtä sekretariaatissaki. Kerroppa, mitä sie alat tekheen?

Mie piän ennen kaikkia Stefan Aron kansa yhtheenjärjestää komisuunin haastattelutyötä, mikä tarkottaa ette mie tulen reisaahmaan minuriteettiseuvuila ja muissa paikossa haastatelemassa niitä jokka oon ilmottanheet ittensä.

Tämä oon tehtävä joka riittää 24 helmikuusta 1 kesäkuuhuun 2022 saakka. Mie olen siotettu Pajahlaan koko sen periuutin.

Mikäs tausta sulla oon?

Mie olen ollu töissä minuriteettikysymyksitten kansa olletikki tornionlaaksolaisile, kväänile ja lantalaisile vuelta 2015 lähtien. Ko mie olin puhheenjohtaja ja johtokuntajäsen Met Nuoret liitossa niin mie olin muun muassa töissä valtiolisen tutkimuksen kansa: ”Seuraava askel? Ehotuksia vahvistetulle minuriteettipolitiikale”/”Nästa steg? Förslag för en stärkt minoritetspolitik” (SOU 2017:60), Queersanakirjan, Kielipaketin kansa uusile vanheemille ja rajanylittävitten yhtheistöitten kansa Kvääninuoret Norjassa.

Mie olen kestävyysspesialisti jollako oon fuukkys oikeuenmukasuutheen ja pollishyyn ja mulla oon tausta valtiontietheessä ja kestävyystietheessä. Paitti minuriteettipolitiikkatyön kansa mie olen ollu töissä kestävyystutkinon ja oikeuenmukasuuskysymyksitten kansa Vietnamissa, Indonesiassa ja Tanzaniassa. Vietnamissaki mie olin töissä projektissa joka koski minuriteettikysymyksiä.

No sitten sulla oon liitheitä niin Norrbottenhiin ko Tornionlaakshoon?

Joo, mie olen syntyny ja kasunu ylös Pajalassa mutta kansa Luulajassa ja Ahvenanmaala. Mie olen aina pitäny Pajalaa minun kotina vaikka mie olen asunu minun täytenä ollessa elämän ulkomaila ja Eteläruottissa.

Sie puhut monta kieltä, kunkas sie sait meänkielen?

Mie olen oppinu riikinsuomea, ruottia ja englantinkieltä kotoa. Minun vanhiimat ei opettanheet mulle meänkieltä mutta mie olen kuulu kieltä minun kasvattiaikana. Mie olen aina ymmärtänny meänkieltä mutta en ole uskaltannu puhua kieltä vasta ko täytenä. Minun konsti oon ollu ette heittää fukyseeraamasta ette hävetä ette mie en ossaa sitä perfektisti ja sen siihaan hunteerata ette se oon tähelisempi ette mie saan jotaki sanotuksi.