Komisuuhniin kuuluu yks puhheenjohtaja, kahdeksan jäsenettä ja yks kanslia ja jokhainen esitethään tässä alla.
Elisabet Fura
Elisabet Fura oon komisuunin puhheenjohtaja. Elisabet oon jyristi ja oon ennen ollu pääjystiitieasiamies, tuomari ihmisoikeusille Eurooppatuomioistuimella ja puhheenjohtaja Ruottin atvokaattiyhistykselle. Elisabet oon kunniatohturi jyritisellä fakylteetilä Stokholmin yniversiteetilä. Hään oon innostunnu kysymyksistä joilako oon yhtheys ihmisoikeuksitten kansa ja hään oon ollu jäsen Ruottin atvokaattiyhistyksen oikeusturvakomiteassa ja sen komiteassa ihmisoikeuksille. Paitti ette hään oon ollu matkassa useamassa valtiolisessa tutkimuksessa Ruottissa Elisabetilla oon kansa usea kansanvälinen tehtävä takana. Hään oon muun muassa ollu puhheenjohtaja kansanvälisessä atvokaattiyhistyksessä ja ollu matkassa eri avustusprojektissa oikeutheen kuuluvalla aluheela esimerkiksi Ryssässä, Laoksessa ja Vietnamissa.
Kontakti: elisabet.fura@regeringskansliet.se
Jäsenet
Hanna Aili
Hanna oon antikvaari ja oon muun muassa tehny töitä nostamalla kansalisitten minuriteetitten kertomuksia museokokoelmissa. Hannala oon fil.kand. kulttuuriperintötutkimuksissa Jöötteporin yniversiteetilä jossako hään kirjotti siittä kunka nuoret täyet, jokka itenttifieeraavat itteä tornionlaaksolaisina, pitävät meänkielen kielirevitaliseerinkiä. Hanna oon entinen puhheenjohtaja STR-T:n nuorisoliitole Meän Nuoret.
Malin Arvidsson
Malin oon fil. dr histuuriassa ja toimii opettajanna ja tutkianna Osastolla ihmisoikeuksille, Histuurialisella laitoksella, Lundin yniversiteetilä. Malinin tutkimus oon suuntautunnu histuurialisheen oikeuenmukhaisuutheen. Hään oon muun muassa tutkinu prosessista ette kompenseerata niitä jokka oon pakolisesti steriliseerattu ja kompensasuunista henkilöile joitako oon pahoinhoijettu ko net olit siotettu sosiaalin lastenhoithoon.
Lars Elenius
Lars oon professori emeritus histuuriassa Luulajan teknisellä yniversiteetilä. Lars oon hänen tutkimuksessa muun muassa tutkinu minuriteettipolitiikan ja kansalisitten minuriteetitten itenttiteettiluomisen yhtheispeliä histuurialisesta perspektiivistä.
Kenneth Hyltenstam
Kenneth oon professori emeritus kakskielisyystutkimuksessa Stokholmin yniversiteetilä. Hänen julkasut koskevat muun muassa kielivaihtelua ja kielisäilyttämistä minuriteettikielissä ja kakskielisessä koulutuksessa.
Klas-Göran Karlsson
Klas-Göran oon histuurian professori Lundin yniversiteetilä ja hään oon kauhean innostunnu nykyaikahistuuriasta jonka kansa, ja jossako met elämä ja olema. Hänen erityiset tutkimusaluheet oon kolme: Itäeuroopan ja Neuvostoliiton/Ryssän uuenaikhainen histuuria, kansanmurha, rikos ihmiskuntaa vasten ja valtionjärjestetty terrori, ja kysymyksiä histuurisen timensuunin paikasta yhtheiskunnassa, kulttuurissa ja koulutuksessa.
Bengt Niska
Bengt oon entinen kunnanneuvos Pajalassa ja entinen puhheenjohtaja Svenska Tornedalingars Riksförbund – Tornionlaaksolaiset.
Kaisa Syrjänen Schaal
Kaisa oon jyristi ja senioori policyneuvonantaja Ruottin kirkossa ja ekspertti minuriteettikysymyksissä. Kaisa oon ollu töissä minuriteettikysymyksitten kansa Hallituskansliassa, valtiolisessa tutkintojärjestelmässä ja siviliyhtheiskunnassa. Kaisa oli pääsekreteerari Tutkinossa minuriteettipolitiikan ylösseurauksesta ja Tutkinossa suomalaisista ja eteläsaamelaisista kielistä.
Sia Spiliopoulou Åkermark
Sia oon tusentti kansanoikeuessa ja tirektööri ja tutkimusjohtaja Ahvenanmaan rauhainstityytilä. Sia oon tutkinu kansalisista minuriteettikysymyksistä ja hään oon ollu monivuotinen jäsen Euroopparaatin neuvonantajassa komiteassa kansalisille minuriteetile.
Sekretariaatti
Anna-Lena Sjölund
Anna-Lena Sjölund oon pääsekreteerari komisuunissa. Anna-Lena oon ennen ollu töissä mm ihmisoikeuksitten kysymyksitten yhtheensovittamisen ja kehityksen kansa kansalisella tasola Hallituskansliassa. Hällä oon äksaami kansanoikeuksessa Turun Akatemiista ja jyritiikkaäksaami New York University, School of Law. Anna-Lena oon vastuulinen ette suunitella ja johtaa komisuunin työtä suuntaviivoitten mukhaan komisuunilta ja sen puhheenjohtajalta. Hänen työ tullee kansa olheen ette kirjottaa komisuunin loppumietinön.
Kontakti: anna-lena.sjolund@regeringskansliet.se
Stefan Aro
Stefan oon sekreteerari komisuunissa. Stefan oon pappi, toimii Övertorneån seurakunnassa ja oon osalistunnu minuriteettikysymykshiin kaikila tasoila Ruottin kirkossa. Hään oon kehittänny oppimateriaalia meänkielelä ja ollu matkassa käänösprojektissa. Julkasu Ette tohtia olla oma itte – en samtalsbok om språk, tro och identitet i Tornedalen (2018) oli merkkipaalu kirkon sovintotyössä. Hään oon johtanu projektia Pohjoskalotilla koulutuksessa ja kielirevitaliseerinkissä ja ollu töissä minuriteettikieliyhtheensovittajanna kunnassa.
Kontakti: stefan.aro@regeringskansliet.se
Josephine Ylipää
Josephine oon fil. mag. ja tutkimusasistentti kestävyystietheessä ja entinen puhheenjohtaja nuorisojärjestössä Met Nuoret.
Kontakti: josephine.ylipaa@regeringskansliet.se
Josefin Rönnbäck
Josefin oon fil.dr histuuriassa ja toimii Luulajan teknisellä yniversiteetilä. Hään oon muun muassa tutkinu ruottalaisesta temokratiseerinkiprosessista ja vaimoitten polittisitten oikeuksitten ja maholisuuksitten taistelusta Ruottissa. Viimisinnä vuosina hään oon päänänsä, opettajakoulutuksitten raamin sisälä, pitäny kursia histuuriassa joka erityisesti oon käsitelly vaikeita suhtheita kansalisuuen, etnisiteetin ja itenttiteetin välissä, ja minuriteettipolitiikka ja kansalisitten minuriteetitten histuuriata.
Kontakti: josefin.ronnback@regeringskansliet.se
Paula Pontvik
Paulala oon juristikoulutus Uppsala universitetiltä, ja oon ennen ollu töissä sekreteerarinna Kulttuuriteparttemäntin temukratiaselvityksessä. Hään tullee ennen kaikkia tekheen työtä kirjottamassa komisuunin loppuraporttia.
Kontakti: paula.pontvik@regeringskansliet.se
Eva Dahlén
Komyniseeraaminen.
Kontakti: eva.dahlen@regeringskansliet.se
Elsa Hellqvist
Elsa vastaa atministrasuunista.
Kontakti: elsa.hellqvist@regeringskansliet.se