Viimi vuen aikana Tottuus- ja sovintokomisuuni tornionlaaksolaisile, kväänile ja lantalaisile piti rapean toistakymmentä kahvikokkousta ympäri Norrbottenia ja monessa isomassa kaupunkissa maassa. Nyt ko työ oon menossa loppuvaiheesheen se oli toisen kupin aika. Tällä kertaa Kaihnuussa.
Valosa keväilta alotethiin Kulttuurikoulun oppilhaitten musikilla ja laulula. Net lauloit laulun jossako oli niin meänkielistä ko ruottalaista tekstiä. Kolmisenkymmentä kuunteliata tuli kuuntelheen musikkia ja Tottuus- ja sovintokomisuunin käynissäolevasta työstä.
Stefan Aro ja Eva Dahlén sekretariaatista kerroit tehtävästä ja kunka työtä tähhään mennessä oon tehty, mutta kansa mitä oon tullu esile työn aikana. Olletikki haastatteluissa joissako monet ihmiset oon valikoihneet ette jakkaa komisuunile heän omia elikkä likhiisitten kertomuksia. Kertomukset olit koulunkäynistä ja työtuvista, kielosta ette puhua ommaa äitinkieltä ja kertomuksia näkymättömäksitekemisen tuntheesta.
Yks tykätty ohjelmanosa illan aikana oli ko Hillavik ryhmä, Johanna Lindgrenin johola, pelasit ja lauloit. Musikhiin tarjothiin kahvia ja kakkoa.
Kokkouksen aikana Kaihnuussa, komisuuni sai kansa maholisuuen kertoa tutkimuksen kartottamisesta assimileerinkipolitiikasta ja temaattisista aluheista. Komisuunile oli olletikki tärkeätä ette pittää keskustelua jatkuvitten toimitten ehotuksista. Usseita intresanttia ehotuksia tuli pypliikiltä, muun muassa ette parantaa meänkielen kieliopetusta lapsile, lisätä paikkakuntatuotettua sisältöä meetiassa ja instansin tarpheesta joka seuraa ylös ette minuriteettilakia nouatethaan ja mihinkä minuriteetti saattaa kääntyä ette saaja tukea. Otethiin kansa ylös toivomus ette pitäs ”kuunella minuriteettiä”.
Ilta lopetethiin mutta ei kelhään ollu hoppu kotia. Monet valikoittit ette jääjä vielä pikku hetken mietiskelheen illan keskusteluista.
